ក្រុមហ៊ុន MINI បានប្រារព្ធទិវាសិទ្ធនារីអន្តរជាតិជាមួយនឹងការបង្ហាញនូវ Mini Pat Moss Edition ថ្មី

Mini គឺជារថយន្តខា្នតតូចរបស់ចក្រភពអង់គ្លេសដែលបង្កើតឡើងក្នុងឆ្នាំ ១៩៥៩ មកម្លេះ។ នៅក្នុងឆ្នាំ ២០០០ ម៉ាកយីហោរថយន្តខ្នាតតូចមួយនេះត្រូវបានក្លាយជាកម្មសិទ្ធិរបស់ក្រុមហ៊ុន BMW Group ដែលបានរក្សាឈ្មោះនេះរហូតមកដល់ពេលបច្ចុប្បន្ន។

ដើម្បីអបអរដល់ទិវាសិទ្ធនារីអន្តរជាតិក្រុមហ៊ុន Mini ក៏បានបង្ហាញនូវម៉ូដែល Pat Moss ស៊េរីឆ្នាំ ២០២៣ ។ អ្វីដែលគួរឱ្យចាប់អារម្មណ៍សម្រាប់ឈ្មោះ Pat Moss ត្រូវបានយកតាមឈ្មោះអ្នកប្រណាំងរថយន្តដែលជាស្រ្តីហើយគាត់មានឈ្មោះថា Pat Moss នេះឯង។

នៅឆ្នាំ ១៩៦២ គាត់ត្រូវបានគេចាត់ទុកថាជាអ្នកបើកបរដ៏កំពូលម្នាក់ក្នុងការប្រណាំង Tulip Rally ដោយបាននាំយកនូវម៉ូដែលរថយន្ត Mini Classic ហើយវាក៏ជាជ័យជម្នះលើកដំបូងរបស់គាត់ផងដែរ។ ជាអកុសលអ្នកស្រី Pat Moss បានទទួលមរណៈភាពក្នុងឆ្នាំ ២០០៨ ដែលធ្វើឱ្យក្រុមហ៊ុន Mini បានចងចាំនូវប្រវត្តិដ៏អស្ចារ្យរបស់គាត់រហូតមកដល់ពេលបច្ចុប្បន្ននេះ។

ការបង្ហាញខ្លួនរបស់រថយន្ត Mini Pat Moss គឺជាគោរពទៅដល់ជ័យជម្នះរបស់អ្នកស្រីពីអតីតកាលមក។ ប៉ុន្តែ Mini ត្រូវបានកំណត់ត្រឹមតែ ៨០០ គ្រឿងប៉ុណ្ណោះដោយវាបានមកជាមួយទម្រង់ដូចទៅនឹង Cooper S Hardtop 2 Door, Cooper S Hardtop 4 Door និង John Cooper Works Hardtop ដែលនឹងមកដល់នៅក្នុងខែឧសភា ឆ្នាំ ២០២២ ខាងមុខនេះ។

រថយន្ត John Cooper Works Hardtop 2 Door និង Mini Pat Moss ឆ្នាំ ២០២៣ នឹងក្លាយជាម៉ូដែលលក់ផ្តាច់មុខនៅសហរដ្ឋអាមេរិក។ ការរចនាដំបូលបែប Multitone ដែលរួមបញ្ជូលជាមួយពណ៌ Chili Red, Melting Silver និង Jet Black ។

ដោយផ្នែកខាងមុខនៃរថយន្តក៏បានបន្ថែមជាមួយនឹងហត្ថលេខារបស់អ្នកស្រី Pat Moss ហើយនៅលើកម្របម៉ាស៊ីនរថយន្តក៏បានបន្ថែមឈ្នូតសរជាមួយនឹងផ្លាកសញ្ញា Tulip តំណាងឱ្យការប្រណាំង Tulip Rally ៕

អត្ថបទដោយ៖ សាល សក្កណា