រថយន្តអគ្គិសនីដ៏ចំលែករបស់ Alibaba មានតម្លៃត្រឹមតែ ២,០០០ ដុល្លារប៉ុណ្ណោះ

Alibaba គឺជាពាណិជ្ជកម្មអេឡិចត្រូនិចដ៏ធំមួយរបស់ពិភពលោកដែលបង្កើតឡើងដោយលោក Jack Ma។ ថ្មីៗនេះនៅលើគេហទំព័រពាណិជ្ជកម្មអេឡិចត្រូនិច Alibaba បានបង្ហាញនូវរថយន្តអគ្គិសនីដ៏ចំលែកមួយប្រចាំសប្តាហ៍ដែលជាប្រភេទរថយន្ត Pick-up អគ្គិសនីរបស់ចិន ដោយវាត្រូវបានដាក់លក់តាំងពីខែមុនមកម្លេះ។

ផ្នែកខាងក្រៅនៃរថយន្ត Pick-up មួយនេះមើលទៅពិតជាគួរឱ្យចំលែកយ៉ាងខ្លាំងដែលស្រោបទៅដោយពណ៍ផ្កាឈូកជាមួយចង្កៀងភ្លើងខាងមុខមានរៀងជាអក្សរ C ដោយមានប្រវែង ៣.៥ ម៉ែត្រ ។ រីឯប៉ាណាខាងមុខក៏បានភ្ជាប់មកជាមួយនឹង Logo GMC ហើយវាក៏បំពាក់ទៅដោយកង់ទំហំ ១២ អ៊ីញនិងបានរួមបញ្ចូលឌីសហ្វ្រាំងផងដែរ។

ចំណែកឯផ្នែកខាងក្នុងនៃរថយន្តដែលមានកៅអីចំនួនពីរដ៏ធំទូលាយផងដែរ។ ហើយរថយន្ត Pick-up ខ្នាតតូចមួយនេះក៏បានបំពាក់មកជាមួយនឹងម៉ូទ័រកម្លាំង ១.៥ គីឡូវ៉ាត់ដែលអាចបង្កើតល្បឿនបានរហូតដល់ ៤៥ គីឡូម៉ែតក្នុងមួយម៉ោង។

ជាមួយគ្នានេះដែលរថយន្ត Pick-up ដ៏ចំលែកមួយនេះមានសមត្ថភាពផ្ទុករហូតទៅដល់ ៤០០ គីឡូក្រាម ដែលវាបានបំពាក់ទៅដោយថ្ម Li-ion ជាមួយនឹងកម្លាំងអគ្គិសនី ៦០ វ៉ុលស្មើនឹង ៨០ អំពែរម៉ោងដែលវាអាចបង្កើតកម្លាំងថ្ម ៤.៨ គីឡូវ៉ាត់ម៉ោង អាចរត់បានចម្ងាយចន្លោះពី ៧០ ទៅ ១៣០ គីឡូម៉ែត្រនៅពេលសាកថ្មពេញ។

រីឯតម្លៃនៃរថយន្ត Pick-up ខ្នាតតូចមួយនេះមានតម្លៃត្រឹមតែ ២,០០០ ដុល្លាប៉ុណ្ណោះដែលជាតម្លៃត្រូវបានដាក់លក់នៅក្នុងទីផ្សារពាណិជ្ជកម្មអេឡិចត្រូនិក Alibaba ។

អត្ថបទដោយ៖ សាល សក្កណា