សង្គ្រាមរវាងរុស្ស៊ីនិងអ៊ុយក្រែនធ្វើឱ្យមានផលប៉ះពាល់យ៉ាងខ្លាំងដល់ឧស្សាហកម្មផលិតរថយន្តជាច្រើន

ការលុកលុយរបស់រុស្ស៊ីទៅលើអ៊ុយក្រែនថ្មីៗនេះបានធ្វើឱ្យទីផ្សារអឺរ៉ុប និងសកលលោកធ្លាក់ក្នុងភាពច្របូកច្របល់យ៉ាងខ្លាំង ខណៈដែលក្រុមហ៊ុនផលិតរថយន្តជាច្រើននឹងត្រូវប្រឈមមុខជាមួយបញ្ហាដូចជាកង្វះខាតនៃវត្ថុធាតុដើម ការដឹកជញ្ជូន ការដំឡើងថ្លៃនៃប្រេងឥន្ធនៈ និងការដំឡើងតម្លៃនៃទំនិញនៅពេលដ៏ខ្លីខាងមុខនេះ។

បញ្ហាដ៏ធំនៃសង្គ្រាមមួយនេះគឺកង្វះនៃវត្ថុធាតុដើមជាច្រើន ជាមួយនិងការឡើងថ្លៃនៃប្រេងឥន្ធនៈ។ នៅដើមឆ្នាំ ២០២២ នេះក្រុមហ៊ុនផលិតរថយន្ត EV មួយចំនួនកំពុងតែមានការខ្វះខាតនៃបន្ទះឈីប Semiconductors ខណៈដែលកំពុងតែមានសង្គ្រាមផងនោះធ្វើឱ្យក្រុមហ៊ុនផលិតរថយន្តរឹតតែពិបាកយ៉ាងខ្លាំងក្នុងការដោះស្រាយបញ្ហាមួយនេះ។

ជាមួយគ្នានេះដែលអ្នកជំនាញជាច្រើនមានការព្រួយបារម្ភយ៉ាងខ្លាំងទៅលើរថយន្តអគ្គិសនីដោយនិងអាចប្រឈមមុខនឹងការធ្លាក់ចុះមួយចំនួន។ រុស្ស៊ីគឺជាប្រទេសនាំចេញដ៏ធំបំផុតមួយនៃលោហធាតុ Palladium ដែលមានតួនាទីបន្សុទផ្សែងពុលពីក្នុងរថយន្តដែលនឹងអាចធ្វើឱ្យមានការប៉ះពាល់ទៅលើឧស្សាហកម្មរថយន្តជាច្រើនផងដែរ។

រីឯប្រទេសអ៊ុយក្រែនក៏ជាប្រទេសមួយចំណែក ដែលបាននាំចេញនូវវត្ថុធាតុដើមភាគច្រើននៃបន្ទះឈីប Semiconductor ដោយធ្វើឱ្យមានការផ្អាកមួយរយៈក្នុងការនាំចេញ។ អ្នកជំនាញបានបន្ថែមទៀតថា រុស្ស៊ីគឺជាប្រទេសផលិតប្រេងឆៅដ៏ធំបំផុតមួយដែលនឹងអាចនាំឱ្យមានតម្លៃប្រេងឡើងថ្លៃលើសពី ១០០ ដុល្លារក្នុងមួយបារ៉ែល។

បើតាមរបាយការណ៍របស់ប្រទេសឥណ្ឌាបានបង្ហាញថាជាងពាក់កណ្តាលនៃតម្រូវការឧស្ម័នរបស់ខ្លួនដែលបាននាំចូលដោយប្រទេសអ៊ុយក្រែន ហើយផ្នែកតូចនៃតម្រូវការឧស្ម័នក៏មានប្រភពមកពីប្រទេសរុស្ស៊ីផងដែរ។

ដូចច្នេះការផ្ទុះសង្គ្រាមរវាងរុស្ស៊ីនឹងអ៊ុយក្រែននេះគឺពិតជាមានផលប៉ះពាល់យ៉ាងខ្លាំងដល់វិស័យឧស្សាហកម្មផលិតរថយន្ត និងប៉ះពាល់ទៅដល់សេដ្ឋកិច្ចពិភពលោកជាច្រើនផងដែរ៕

អត្ថបទដោយ៖ សាល សក្កណា