ក្រុមហ៊ុន GM គ្រោងចំណាយទឹកប្រាក់ជាង ៣ ពាន់លានដុល្លារសម្រាប់គម្រោងរថយន្តអគ្គិសនី

ក្រុមហ៊ុន General Motors គឺជាក្រុមហ៊ុនផលិតរថយន្តចម្រុះជាតិសាសន៍របស់អាមេរិក ដែលជាក្រុមហ៊ុនផលិតរថយន្តដ៏ធំបំផុតរបស់អាមេរិក ដែលមានទីស្នាក់ការកណ្តាលនៅទីក្រុង Detroit រដ្ឋ Michigan ។ ហើយសព្វថ្ងៃនេះក្រុមហ៊ុននេះមានភាពល្បីល្បាញយ៉ាងខ្លាំងក្នុងទីផ្សារផលិតរថយន្តប្រណីត។ ថ្មីៗនេះបានលេចឮដំណឹងថាក្រុមហ៊ុន General Motors Co គ្រោងនឹងបណ្តាក់ទុនជាង ៣ ពាន់លានដុល្លារ ដើម្បីបង្កើតរថយន្តអគ្គិសនីនៅក្នុងរដ្ឋ Michigan ដែលជាដែលជាស្រុកកំណើតរបស់ខ្លួន ។

ក្រុមហ៊ុននេះកំពុងបញ្ចប់គម្រោងសម្រាប់គម្រោងរថយន្តអគ្គិសនីចំនួនពីរនៅរដ្ឋ Michigan។ គម្រោងមួយគឺការបំប្លែងរោងចក្រ Orion Assembly របស់ខ្លួននៅទីក្រុង Detroit ដើម្បីធ្វើជាមជ្ឈមណ្ឌលផលិតរថយន្តម៉ាក Chevrolet Bolt EV ដែលនឹងត្រូវចំណាយទឹកប្រាក់យ៉ាងហោចណាស់ ២ ពាន់លានដុល្លារ ហើយរំពឹងថានឹងអាចបង្កើតការងារបានជាង ១,៥០០ កន្លែងនៅក្នុងរោងចក្រ ។

គម្រោងមួយទៀតគឺការបណ្តាក់ទុនរួមគ្នាចំនួន ២ ពាន់លានដុល្លារជាមួយដៃគូក្រុមហ៊ុន LG Energy Solutions ដើម្បីបង្កើតរោងចក្រផលិតកោសិកាថ្មនៅទីក្រុង Lansing រដ្ឋ Mich ដែលវាអាចបង្កើតការងារបានប្រហែល ១,២០០ កន្លែង។ GM បានបញ្ជាក់ថា នាយកប្រតិបត្តិក្រុមហ៊ុន GM កំពុងពិភាក្សាជាមួយមន្ត្រីរដ្ឋាភិបាលក្នុងតំបន់ ដើម្បីទទួលបានការបន្ធូរបន្ថយពន្ធ និងការអនុម័តគម្រោងផ្សេងៗទៀត។

ការវិនិយោគរបស់ក្រុមហ៊ុន GM នឹងជាផ្នែកមួយនៃការចំណាយ ៣៥ ពាន់លានដុល្លាររបស់ខ្លួនលើរថយន្តអគ្គិសនី និងស្វ័យប្រវត្តិរហូតដល់ឆ្នាំ ២០២៥ ។ ក្រុមហ៊ុន GM បាននិយាយថា ខ្លួនចង់យកឈ្នះក្រុមហ៊ុន Tesla ដែលជាអ្នកដឹកនាំទីផ្សារក្នុងការលក់អគ្គិសនីនៅសហរដ្ឋអាមេរិក។ ហើយក្រុមហ៊ុនផលិតរថយន្តនេះគ្រោងនឹងលក់រថយន្ត EV ទ្វេដងនៅឆ្នាំ ២០៣០ ហើយសង្ឃឹមថានឹងលក់តែរថយន្តអគ្គិសនីនៅឆ្នាំ ២០៣៥ ក្នុងការដេញថ្លៃប្រកួតប្រជែងជាមួយនឹងក្រុមហ៊ុន Tesla ។