ចេះតែមានហើយ! ខ្លារខិនមួយក្បាលវង្វេងចូលរោងចក្រដំឡើង Mercedes-Benz នៅឥណ្ឌាធ្វើឱ្យរោងចក្រត្រូវផ្អាកជាច្រើនម៉ោង

ក្នុងរយៈពេលប៉ុន្មានខែកន្លងមកនេះឧស្សាហកម្មផលិតរថយន្តជាច្រើនត្រូវបានផ្អាករោងចក្រដោយសារតែហេតុផលជាច្រើនដូចជា កង្វះគ្រឿងបន្លាស់ ជំងឺរាតត្បាត និងគ្រោះធម្មជាតិជាដើម។ ឥឡូវនេះឧបទ្ទវហេតុថ្មីមួយបានកើតឡើងនៅឯប្រទេសឥណ្ឌា ដែលមានការគំរាមកំហែងពីខ្លារខិនមួយក្បាលដោយវាបានឈ្លានពានចូលទៅក្នុងរោងចក្រផលិតរថយន្តរបស់ក្រុមហ៊ុន Mercedes-Benz ។

ប៉ុន្មានថ្ងៃកន្លងមកនេះកម្មករនៅក្នុងរោងចក្រផលិតរថយន្ត Mercedes Benz ដែលស្ថិតនៅក្នុងទីក្រុង Chakan សង្កាត់ Maharashtra ប្រទេសឥណ្ឌាបានប្រទះឃើញនូវសត្វខ្លារខិនឈ្មោលអាយុ ៣ ឆ្នាំមួយក្បាលដែលវាបានវង្វេងផ្លូវចូលទៅសងំក្នុងរោចក្រ។

ហើយការឈ្លានពានពីសំណាក់ខ្លារខិនវ័យក្មេងមួយនេះបានធ្វើឱ្យកម្មករនៅទីនោះមានការភិតភ័យយ៉ាងខ្លាំងដោយក្រុមហ៊ុនត្រូវបានផ្អាកការផលិតអស់ជាច្រើនម៉ោង។ ខណៈពេលភ្លាមៗនោះកម្មករក៏បានជូនដំណឹងទៅនាយកដ្ឋានព្រៃឈើដោយជាប់ពាក់ព័ន្ធនឹងអង្គការ Wildlife SOS ដែលជាអង្គការជួយសង្គ្រោះសត្វព្រៃដើម្បីសុំជំនួយ។

ទន្ទឹមនឹងនេះក្រុម Wildlife SOS ក៏បានប្រញាប់ប្រញាល់ចេញប្រតិបត្តិការដើម្បីជួយសង្គ្រោះដល់កម្មករ និងខ្លារខិនមួយក្បាលនោះ។ បន្ទាប់ជម្លៀសបុគ្គលិក ក្រុមការងារបានតាមដានសត្វខ្លារខិននោះយ៉ាងយកជិតទុកដាក់ ដើម្បីរកឱកាសល្អនឹងសម្រេចចិត្តបាញ់ថ្មាំសន្លប់។

រយៈពេល ១ ម៉ោងក្រោយមកខ្លារខិនមួយនេះក៏ត្រូវបានយកចេញពីរោងចក្រដោយប្រុងប្រយ័ត្ន ហើយក្រុមការងារក៏បានដោះលែងសត្វខ្លារខិនឱ្យត្រឡប់ទៅក្នុងព្រៃវិញដោយគ្មារបួសអ្វីឡើយ។

ទន្ទឹមជាមួយគ្នានេះដែរនៅក្នុងឆ្នាំ ២០១៧ មានឧបទ្ទវហេតុស្រដៀងគ្នានេះបានកើតឡើងនៅក្នុងទីក្រុង New Delhi ដោយខ្លារខិនមួយក្បាលបានចំណាយអស់រយៈពេលមួយថ្ងៃកន្លះលាក់ខ្លួនក្នុងរោងចក្រផលិតរថយន្តដ៏ធំមួយរបស់ប្រទេសឥណ្ឌា។

រីឯនៅក្នុងឆ្នាំ ២០២០ ក៏មានករណីដែលស្រដៀងគ្នានេះដែរ ដោយមានពស់ព្រៃដ៏ធំមួយក្បាលបានសងំនៅឯការដ្ឋានស្ថានសាងសង់របស់រោងចក្រផលិតរថយន្ត Tesla ដែលស្ថិតក្នុងប្រទេសរអាល្លឺម៉ង់ហើយក៏ត្រូវបានផ្អាកការសាងសង់អស់រយៈពេល ១ ថ្ងៃផងដែរ។ ទាំងនេះគឺជាករណីមួយដ៏កម្រសម្រាប់ក្រុមហ៊ុនផលិតរថយន្ត ហើយវាជាករណីមួយដែលមានការខាត់បង់ជាច្រើនទៀតផង៕

អត្ថបទដោយ៖ សាល សក្កណា