ជំនាន់ទី4​ នៃរថយន្តកំពូលSUV Hyundai Tucson ស៊េរី2022

ការចាប់ផ្តើមនៃដំណើរផ្សងព្រេងបន្ទាប់របស់អ្នកជាមួយនឹងបច្ចេកវិទ្យាកាន់តែទំនើប សុវត្ថិភាពកាន់តែខ្ពស់ និង ថាមពលកាន់តែខ្លាំង។ នេះគឺជារចនាបថផ្នែកខាងក្រៅនៃរថយន្ត Hyundai Tucson ដែលជាការរចនាឡើងផ្អែកទៅតាមអត្តសញ្ញាណរបស់ Hyundai ដែលគំរូរបស់វាហៅថា Parametric Dynamics ។ ផ្ទៃខាងមុខគ្របដណ្តប់ដោយប៉ាណាត្រូវបានរចនាថ្មីដែលអមដោយចង្កៀង “half Mirror” ប្រភេទ Daytime running light ។

ជំនាន់ថ្មីនេះផងដែរ តួរនៃរថយន្តជាការរចនាតាមបែប sport ជាជាងរចនាបែបគ្រួសារ​​។ បើផ្តោតទៅមើលការរចនាផ្នែកខាងក្រោយវិញ Tail light តម្រៀបពេញទទឹងជាត្រីកោណដែលមើលទៅស្រដៀង នឹង LED ផ្នែកខាងមុខ។ មួយវិញទៀតផ្លាកយីហោ Hyundai ត្រូវបានរំកិលឡើងលើបញ្ចូលជាមួយកញ្ចក់ក្រោយ ឯផ្លិតទឹកក៏បានរំកិលឡើងលើផងដែរ ដោយវាបានលាក់ខ្លួននៅខាងក្រោម Spoiler ។ រថយន្តនេះក៏បានបំពាក់នៅយ៉ាន់កង់ 19inch ប្រភេទ Alloy Wheel។

ចំណែកឯផ្នែកខាងក្នុង បានរចនាឡើងយ៉ាងទូលាយនិង ការប្រើប្រាស់នូវបច្ចេកវិទ្យាទំនើបពាសពេញរថយន្ត ដែលផ្តល់តាមតម្រូវការរបស់លោកអ្នក។ មិនតែប៉ុណ្ណោះកៅអីអង្គុយរបស់វាបានផ្តល់នូវការម៉ាស្សានៅត្រង់ចង្កេះ និងមានផាសុកភាព។ វាក៏មានការគ្រប់គ្រងស៊ីតុណ្ហភាពដែលអាចអោយ អ្នកបើកបរ និងអ្នកដំណើរធ្វើការកំណត់សីតុណ្ហភាពផ្សេងគ្នាបាន។

ដោយប្រព័ន្ធទំនើបរបស់យើងអនុញ្ញាត្តអោយអ្នកជ្រើសរើសអាំងតង់ស៊ីតេលំហូរខ្យល់ 3កម្រិតខណៈពេលដែលប្រព័ន្ធត្រូវបានកំណត់ធ្វើអោយប្រសើរឡើងសម្រាប់ការបើកបរទូទៅ។ អាកាសធាតុល្អជាមួយ នឹងការស្តាប់តន្រីដែលបំពងសំលេងពិរោះច្បាស់ជាមួយនឹង Speaker ចំនួន 10គ្រាប់ ម៉ាក BOSE ។ បន្ទាប់ពីនោះលោកអ្នកនឹងបានជួបជាមួយនឹងបច្ចេកវិទ្យាថ្មីរបស់ Tucson ដែលនាំមកនូវអេក្រង់ ឌីជីថល 10.25inch ដែលមានមុខងារពិសេសៗជាច្រើន។ ក្នុងនោះមានប្រព័ន្ធប្រតិ្តបត្តិការ Android ដោយស្វ័យប្រវត្តិ និង Apple Carplay អាចភ្ជាប់ជាមួយនឹងទូរស័ព្ទរបស់អ្នកហើយក៏មានមុខងារពិសេសជាច្រើនទៀតដែលបង្ហាញនៅលើអេក្រង់ Touchscreen នេះ។

សាកថ្មទូរស័ព្ទរបស់អ្នកជាមួយនឹងខ្សែរសាក Wireless ឥតខ្សែរដ៏ងាយស្រួល។ លោកអ្នកក៏អាចភ្ជាប់ប្រព័ន្ធពីយានយន្តទៅកាន់ទូរស័ព្ទតាមរយៈបណ្តាញ Blu-link ដែលបន្ថែមលក្ខណៈទំនើបនៃការគ្រប់គ្រងយានយន្តនៅក្នុងដៃរបស់អ្នក។ ប្រើស្មាតហ្វូនរបស់អ្នកដើម្បីកំណត់ពីមុខងាររបស់ Tucson ពីចំងាយ ដូចជាការកំណត់សីតុណ្ហភាពនៅក្នុងរថយន្ត ការដោះសោររថយន្ត និងមុខងារផ្សេងទៀត។ ចំណែកឯសោរនៃរថយន្តវិញក៏អាចប្រើក្នុងការផ្លាស់ប្តូរទីតាំងរថយន្តចេញពីចំណតឡានឬកន្លែងដែលចង្អៀតដោយស្វ័យប្រវត្តិបានផងដែរ។

Tucson បានផ្តល់ជូននូវ Option 2 ផ្សេងគ្នាដែល Option ដំបូងការដំឡើងម៉ាស៊ីនសាំង 2.5L ដែលប្រើប្រអប់លេខ 8វគ្គអូតូ និងអាចផលិតកម្លាំងបាន 187Hp ជាមួយនឹងកម្លាំងរមួលកង់ 241 Nm ។ បន្ទាប់មកគឺម៉ាស៊ីន Hybrid 1.6L Turbocharge ។ ប្រើប្រភេទអាគុយ lithium-ion 1.49kWh  ជាមួយនឹងប្រអប់លេខ 6វគ្គអូតូ ឯកម្លាំងវិញវាអាចផលិតបាន 227Hp និងកម្លាំងរមួលកង់ 350Nm ។

Tucson មានលក្ខណៈពិសេសនៃការបើកបររបស់វាដោយវាបានបញ្ចូលនូវជម្រើសបិទឬបើករវាងម៉ូតផ្សេងគ្នាដើម្បីស្វែងរកការបញ្ជាចង្កូតដែលអ្នកពេញចិត្តក្នុងការបើកបរដូចជាការជ្រើសរើសរវាង ECO mote Sport mote និង Smart mote ។ ទាំងអស់នេះគឺជាការរចនាម៉ូតសុវត្ថិភាព និង បច្ចេកវិទ្យាឈានមុខគេរបស់ Hyundai ។

បើនិយាយអំពីសុវត្ថិភាពវាត្រូវបានចាប់ផ្តើមតាំងពីស្នូលខាងក្នុងនៃរថយន្តហើយហេដ្ឋារចនាសម្ព័ន្ធ បានផលិតចេញពីថាមពលខ្ពស់ឈានមុខគេរបស់ក្រុមហ៊ុន Hyundai សម្រាប់ការបើកបររបស់លោកអ្នកដែលប្រកបដោយសុវត្ថិភាព។ វាក៏បានបំពាក់នូវប្រព័ន្ធបច្ចេកវិទ្យាដែលជាបណ្តាញច្នៃប្រឌិតថ្មីនៃកាមេរ៉ាបច្ចេកវិទ្យាខ្ពស់ និងឧបករណ៍សម្រាប់ចាប់សញ្ញា ដើម្បីបញ្ជៀសនូវរាល់ការប៉ះទង្គិចគ្នា ឬបង្ហាញសញ្ញាព្រមានអ្នកក្នុងការប៉ះទង្គិចជាមួយអ្នកថ្មើរជើង ឬអ្នកជិះកង់ ប្រសិនបើអ្នកមិនអាចបញ្ឈប់នោះប្រព័ន្ធហ្រ្វាំងបន្ទាន់អាចនឹងត្រូវបានអនុវត្តដោយខ្លួនឯង។ វាក៏មានផ្តល់នូវប្រព័ន្ធសុវត្ថិភាពដែលក្រុមហ៊ុន Hyundai បានបំពាក់លើរថយន្តនេះ ដូចជាការលោតសញ្ញាព្រមានទៅលើគ្រោះថ្នាក់ បន្ថយល្បឿនដោយស្វ័យប្រវត្តិនៅលើផ្លូវកោង និងមានមុខងារអស្ចារ្យជាច្រើនទៀត។ ហើយលក្ខណៈពិសេសដែលរៀបរាប់ទាំងអស់នេះគឺមាននៅក្នុង Hyundai Tucson 2022 ៕